Pag-alaala't Paglimot sa Pamamagitan ng Stick ng Marlboro Black

 *hindi ito sponsored, pero baka pwede mo namang... huyyyy anong pwede mo namang?

Babala: hindi ito kaligayahan
‎
‎
‎O sabi ng mga kaha ng sigarilyo
‎nakasasama sa kalusugan.
‎
‎Pero sa bawat hithit
‎at pagpapadausdos ng usok
‎sa lalamunan
‎saka lang ako nakakahinga
‎nang maalwan;
‎
‎nakasasama sa kalikasan
‎ang bawat buga ng usok.
‎
Makasarili ito.
‎
‎Kaya wala ring panuto
‎kung paano ba ang tamang paninigarilyo.
‎
Makasarili ito.
‎
Kaya dito ko natutuhang lumayo
‎sa mga tao,
‎lalong lalo na sa iyo.
‎
‎Dito ko nagawang pagbigyan
‎ang layaw at pagrerebelde ng katawan
‎habang pilit kang kinakalimutan
‎limutin kung paano mo ko kinumutan
‎ng iyong titig, ng paglalambing
‎kung paano mo ako inangkin
‎kung paano mo sarilihin.
‎
Para kang nicotine,
‎
‎madikit sa labi at hininga
‎at sa mga ugat na nagsanga-sanga
‎sa buo kong katawan
‎sa buo kong katauhan.
‎
Sinikap kong araling mag-isa ang paninigarilyo:
‎
‎1.  Ilapat sa labi ang filter na bahagi, gaya noong tapatin mo ako sa pamamagitan ng nananabik mong labi.
‎2.  Sindihan ang puno't dulo, ang magmimitya ng apoy at init.
‎3.  Sabayan ang pagsindi ng malalim na paghithit
‎at hinayaan kang manghimasok,
‎hanggang sa
‎4. magsimulang umusok at mag-alab
‎-huwag pahintulutang hanginin, lamigin.
‎5. Paraanin paloob sa lalamunan na tila paglunok sa lahat ng mga sandaling wala ka (na).
‎6. Pakawalan ang usok mula sa bibig, gaya ng pagsasambit ng pagpaparaya.
‎7. Ulit-ulitin ang 5-6. Ulit-ulitin, paulit-ulit, hanggang sa maupos ang sigarilyo at pag-aasam sa iyo.
‎
‎Kung gaano kabilis na matupok ang isang haba
‎ay ganun din sana kabilis na alisin ka sa sistema
‎-ganun ka rin naman kabilis kumalas, 'di ba?
‎
‎
Pero gaya nga ng paninigarilyo
‎na kapag sinubok nang simulan
‎ay mahirap nang bitiwan.
‎
‎Alang-alang sa sariling katinuan
‎hihithit pa ako ng ilan pang alaala
‎para matiyak na walang matitira
‎sa sandaling hanap-hanapin ka
‎sa sandaling kabigin ng gunita
‎sa sandaling mangatog at katukin ng iyong presensya
‎sa sandaling manlamig sa pag-iisa.
‎
‎
‎Sa mga usok ko na lamang
‎susubuking ibuga
‎at hubugin ang pangungulila
‎sa wangis ng iyong mukha
‎hanggang sa mahipan na lang ng hangin
‎at hayaang hawiin.

Yosi lang, walang personalan.