Kabataan

Abala ang nagmamadaling lipunan

Na kanilang panustos nawa’y mapag-ipunan

Mga trabahador na kasalamuha sa Santolan

Sa LRT sila’y nakikipagsiksikan.

Mga munting heredera ng bayang sinilangan

Hayon at sa manggagawa’y nakikipagtunggalian

Sa edad nilang taliwas sa nangagmamadaling lipunan

Nagmamadali upang pamilya’y masustentuhan.

Kabataan

Ikaw ang pag-asa ng bayan….

------------------------------------------------

Sa kinagabihan na dapat

pagpikit at pakikipagniig sa kawalang-malay na dimensyon

ang inaatupag, bagkus nakatali

amg isipan sa magulong mundo ng pakikibaka

at pagtahak sa krus na landas ng buhay.

Agad napapawi ang himbing at kapayapaan

ng isipan at ng pusong tumitibok

at sa nalalapit na namang pagkayod at pagkurba ng tadhana

nananatiling hapo ang iyong matatag na isipan at kalooban.

Sa mura mong katawan

na pilit na binubugbog para magkalaman

sikmurang kung palagia'y lutang 

sa kagutuman

ay di mo alintana.

Bagkus kabataan 

ika'y matapang na naninindigan

para sa paggawang marangal

Mabuhay ka!